ازاي تفرق بين القطن والبوليستر، دليل قطوُسة

عارفين إنك لما تيجي تشتري سويت شيرت أو أي لبس للبيت، أكيد بتسأل نفسك: “هل ده قطن ولا بوليستر؟” وطبعًا مش منطقي تولع في الهدوم عشان تعرف؛ بس استثنائيًا مع منتجات “قطوُسة”، بنقدملك عينة من خامتنا القطن وعينة من البوليستر عشان تجرب بنفسك وتولع فيهم. 😄

عشان كده، عملنا لك دليل تفصيلي يساعدك تفرق بسهولة بين القطن والبوليستر.
ولو لسه مش عارف الفرق بينهم وإمتى تختار القطن بدل البوليستر، اضغط هنا: دليل قطوُسة لمعرفة الفرق بين القطن والبوليستر.

ملحوظة مهمة: الطرق دي كلها فعلاً بتساعدك تفرق بين القطن والبوليستر، لكن لازم تعرف إن البوليستر دلوقتي بقى يتطور جدًا وبيقدر ينجح في معظم الاختبارات دي؛ عشان كده، الطريقة الفعلية والفيصل الحقيقي بينهم هو اختبار الولعة. 🔥

1. اختبار الاحتكاك

لو قمت بدعك قطعة القماش ( من عند الكم )، وظهرت آثار لوبر أبيض، فده معناه إن القطعة غالبًا مصنوعة من بقايا القطن ومخلوطة بنسبة من البوليستر؛ وجود الوبر الأبيض ده مؤشر إن الخامة مش 100% قطن طبيعي، بل فيها مزيج من الألياف الصناعية زي البوليستر.

ونسبة البوليستر كل ما بتزيد كل ما فرصة الوبر تزيد.

2. اختبار الكرمشة

اختبار الكرمشة كان من الطرق السهلة للتفريق بين القطن والبوليستر، لأن القطن بطبيعته بيكرمش لما يتطبق؛ ولكن مؤخرًا ظهر نوع من القطن المُعالج ضد الكرمشة، فبالتالي ماينفعش تحكم على الخامة من الكرمشة بس.

الطريقة ببساطة هي إنك تمسك أي جزء من القماش وتبرمه برم خفيف؛ ولو حصل كرمشة جامدة، ده معناه إن نسبة القطن عالية.
أما لو الكرمشة كانت بسيطة جدًا أو مفيش كرمشة خالص، فده معناه إن القماش غالبًا بوليستر.

3. اختبار الملمس

القطن: لما تلمس القطن، هتحس بنعومة طبيعية ودفء مريح؛ هو ناعم على البشرة وبيكون أقل لمعانًا.

البوليستر: بالعكس، البوليستر خامة صناعية، وبتحس إنها ناعمة بس بملمس أملس شوية (ممكن توصفه بالبلاستيكي شوية)، وكمان بارد على الجلد وبيكون فيه لمعة خفيفة.

4. النظر إلى اللمعان

القطن: القطن غالبًا ملوش لمعة واضحة، بيكون مطفي وطبيعي في المظهر.

البوليستر: البوليستر، بسبب تركيبته الصناعية، غالبًا بيميل يكون فيه لمعة خفيفة على السطح، وده بيبان أكتر في الإضاءة.

5. قراءة الملصقات

دي الطريقة الأسهل والأكثر وضوحًا لو بتشتري من مكان موثوق؛ كل قطعة ملابس لازم يكون عليها ملصق بيوضح المكونات.
القطن غالبًا مكتوب عليه “100% قطن” أو “Cotton”، بينما البوليستر هيكون مكتوب عليه “100% Polyester” أو “Polyester”.

الخاتمة

في النهاية، عشان تعرف الفرق بين القطن والبوليستر، عندك طرق كتير زي الإحساس بالملمس، الكرمشة، وحتى دعك القماش.
لكن زي ما وضحنا، التطور في صناعة الأقمشة خصوصًا البوليستر خلى بعض الطرق أقل فعالية لوحدها والبوليستر بينجح فيها.

عشان كده، الأفضل إنك تستخدم أكتر من اختبار مع بعض؛ وطبعا الفاصل بينهم اختبار الولعة بيبقى الحل النهائي والفيصل بين الخامتين.
فلما تختار لبسك، خليك دايمًا واثق إنك بتختار الخامة اللي تناسب راحتك وجودتك.

وطبعا مع قطوُسة احنا بنقدملك التجربة الوحيدة من نوعها وهي انك تولع بنفسك؛ في العينات بتاعتنا! 😉